Fredvang (Lofoten) - Reipå (Helgeland)

Dagen starta med regnver i Lofoten, så eg var godt våt når eg kom til ferja i Moskenes. 

Lofoten

Det var godt med tørre kle i bilen! Det vart ein fin ferjetur på nesten 4 timar til Bodø. Me kosa oss på båten; is vart det òg. Eg hadde enormt behov for mat i dag, så eg åt stort sett heile båtturen!  Kom òg i prat med eit hyggeleg par frå USA. Dei var ivrige syklistar, skigåarar og padlarar. Han hadde gått det Amerikanske Birkebeinarrennet 32 gonger. Om 2 år ville han besøka oss på Hafslo for å sjå vakre Sogn med fjordar, bre og fjell...

Ferja Moskenes - Bodø

 Lite bølger idag, og på slutten var det så varmt og fint at Jane og eg trekte ut på soldekket; flott innsegling til Bodø. Eg har aldri tykt at Bodø er ein fin by (unnskyld vener i Bodø), men Bodø har eit flott omland med mykje fin natur.  Det var fint å starta å sykla ut av Bodø i sol og varmt.

Flott å sykla nedover mot Helgeland som eg alltid har vore svært glad i. Det var ein varm og fin ettermiddag;

kroppen fungerte godt, sjølv med gårsdagens lange etappe i kroppen. Men eg er glad at det berre vart 141 km i dag... Ein har trass alt ferie;-)

Overnatta på Reipå camping.

I dag hadde me ordna med hytte på camping i Meløy kommune. Eg kom fram til nydeleg middag; fiskegrateng, potetstappe og masse grønsaker. Det var godt! Eg et stort sett sunt og riktig; har fått gode ernæringsråd frå dotter Ann Kristin som er ernæringseksperten i familien.

No har eg sykla ca 1100 km, og har sett 1 politibil på vegen. Den møtte eg på søndag i Torsken kommune, Troms politidistrikt. I dag har eg tenkt mykje på alle dei fantastiske folka eg har møtt på mine utallige reiser som tillitsvalt. Det er dei dyktige kvinner og menn som held hjula i gong, sjølv om Noreg har det dårlegaste bemanna politiet i Europa. Eg har møtt utruleg mange dyktige og flotte representantar for politiet; folk som bygger tillit kvar dag!